a. Omuwanika w’Enkuluze
Omuwanika w'Enkuluze ye mukungu wa Kabaka awanika ensimbi za Kabaka eziva mu Lusuku lwe, mu Mailo 350, eziva mu Byalo bya Kabaka, n'endala zonna ezitatunulwamu. Era Omuwanika ono y'akulira n'emirimo mu Lubiri naddala egiba gyetaagisa ensimbi.
b. Ssaabaganzi
Ono ye mwannyina wa Nnamasole omukulu. Obutaka bwe obukulu buli Kkojja mu Kyaggwe. Erinnya lino lyagunjibwawo Ssekabaka Ssuuna II. Edda yayitibwanga Nakasese, kubanga yagendanga nnyo e Ssese mu Balubaale okufunayo amagezi ag'okuwangaaza omwana waabwe ku Bwakabaka. E Kkojja, kkojja wa Kabaka Mawanda ye yasooka okubeerayo. Bakkojja ba Kabaka bonna awamu babeera mwenda:
- Ssaabaganzi abeera Kkojja mu Kyaggwe
- Masimbi abeera Magoggo mu Busiro
- Mulere abeera Buyinja mu Ssingo
- Mmondo abeera Ggulama mu Kyaggwe
- Namutula ng'abeera Mugambazzi mu Buddu
- Nakasese ng'abeera Ssisa mu Busiro
- Muwanga ng'abeera mu Nsumbi e Busiro
- Mukojja ng'abeera Buddu
- Muzaalabuganda ng'abeera Muguluka mu Buddu
